المرشّحة كارلا طوني القزّي على عضوية مجلس بلدية الجديدة – البوشريّة – السّدّ.
خلّيني خبّركن شوي عنّي ولو بالعامّيّة لأن أنا جاية من النّاس للنّاس مش على النّاس:
- حائزة على إجازة في الحقوق من جامعة الحكمة.
- حائزة على ماجستير في القانون المقارن من جامعة الحكمة.
- حائزة على ديبلوم في القانون الكنسي من حامعة الحكمة.
- إنتسبت لنقابة المحامين في بيروت في ٢٠٢٢/٦/٣٠ كمحاميّة متدرّجة.
٥- عملت في العديد من المجالات القانونيّة.
أنا خلقت وربيت بالجديدة- البوشريّة – السدّ من أبّ موظّف بالبلديّة ومعروف بنظافة الكفّ وخدمة المنطقة وربيت على حُبّ هيدي المنطقة لدرجة تجوّزت وضلّيت عايشة بيناتكن.
أنا بعرف المنطقة شارع شارع وبعرف معاناتكن وعايشي بيناتكن مش جاية من المرّيخ متل غيري للأسف وهاوية الكرسي وبسّ!!
زهقنا من مواضيع ما انحلّت وولا بحياتا رح تنحلّ إذا ما عرفتوا تنتخبوا صحّ!!
شو صار بأزمة النّفايات؟! شو صار بالطّرقات المكسّرة اللّي كلّ يوم منكسّر فيا سيّاراتنا!! شو صار بالحديقة المسّكرة وبالمكتبة اللّي فيا؟! شو صار وشو صار وشو صار…؟!
أسألة ما رح تتجاوب إذا ما انتخبتوا صحّ لإلكن ولولادكن!!
أنا نازلة منفردة صحّ بس سألوني شو قادرة أعمل؟!
أنا قادرة كون صوتكن بالمجلس!! الوقت اللّي لازم نوافق فيه منوافق والوقت اللّي لازم نعترض منعترض!! كلّو حسب مصلحة المنطقة مش الجيبة وولا مصلحة الأحزاب!!
نصيحة: ما تنتخبوا أشخاص كانت موجودة وما عملت شي وما تنتخبوا أشخاص لإعتبارات سياسيّة وبعرف الضّخوطات اللّي بتصير على النّاخب!! وما تنتخبوا للمهرجانات السّياسيّة!!
فيكن توعدوا قدّ ما بدكن بس بالنّتيجة إنتو لحالكن رح تفوتوا ورا السّتارة ومعكن ضميركن اللّي رح يأنّبكن ٦ سنين إذا ما انتخبتوا صحّ!!
